Olía í höfninni í Sandgerði

Lögreglu í Keflavík var gert viðvart um allstóran olíuflekk í höfninni í Sandgerði um hádegisbilið í dag. Heilbrigðisfulltrúi Suðurnesja segir magnið ekki mikið en engu að síður sé flekkurinn nokkuð stór að flatarmáli.

Starfsmenn hafnarinnar vinna nú í að hreinsa upp úr höfninni og er búist við að það starf endist eitthvað fram eftir degi. Sem betur fer hafa engir fuglar sest í brákina og vona menn að náist að hreinsa allt upp áður en bjarga þurfi fuglum. Lögreglan rannsakar nú hvaðan olían kom og hvernig það vildi til að hún slapp út.