Borgarbúar munu sjá breytingar á næstu dögum og vikum

Málefni fjölskyldunnar og eldri borgara verða í forgrunni hjá Framsóknarmönnum í Reykjavík í meirihlutasamstarfi þeirra með Sjálfstæðisflokki. Framsóknarmenn í Reykjavík eru ánægðir með komandi meirihlutasamstarf í borginni.

Fjölmennt var á fundi framsóknarfélaganna í Reykjavík sem haldinn var í höfuðstöðvum flokksins við Hverfisgötuna fyrr í kvöld. Björn Ingi Hrafnsson, oddviti framsóknarmanna í Reykjavík, kynnti málefnasamning framsóknarflokks og sjálftæðisflokks á fundinum og að hans sögn voru viðtökur góðar hjá framsóknarmönnum. Hann segir að málefni fjölskyldunnar og eldri borgara verði í forgrunni en að öðru leiti fékkst málaefnasamningur Framsóknarmanna og Sjálfstæðismanna ekki uppgefinn. Hann verður kynntur á morgun að loknum aukafundi í borgarstjórn þar sem kjör borgarstjóra, embættismanna borgarstjórnar og kjör í ráð og nefndir á vegum borgarinnar.

Björn Ingi er ánægður með stöðu flokksins og tilvonandi meirihlutasamstarf. Hann segir að framsóknarmenn muni láta til sín taka í borginni og að flokkurinn verði dæmdur af verkum sínum. Því eigi fylgi flokksins eftir að styrkjast á næstu árum.