Aðstoðuðu menn vegna hrakninga við Seley

Björgunarsveitarmenn frá Neskaupstað komu tveimur mönnum til aðstoðar í kvöld sem farið höfðu út í Seley úti fyrir mynni Reyðarfjarðar en lent í hrakningum vegna veðurs. Beiðni um aðstoð barst á sjötta tímanum frá öðrum mannanna sem var litlum Zodiac-gúmmíbát og hraktist frá eynni vegna slæms veðurs. Björgunarsveitarmenn frá Reyðarfirðri, Eskifirði og Neskaupstað voru kallaðir út og laust eftir klukkan átta komu björgunarsveitarmenn á skipinu Hafbjörgu manninum á bátnum til aðstoðar. Hinn var svo sóttur í Seley og var siglt með þá til Norðfjarðar. Samkvæmt upplýsingum frá Vaktstöð siglinga var engin alvarleg hætta á ferð og amaði ekkert að mönnum þegar að þeim var komið.