Þeir sem vinna meira fá einnig betri einkunnir

Framhaldsskólanemendur sem vinna með námi sýna einnig betri námsárangur þó að tímasókn þeirra sé minni, minni tími fari í heimavinnu og þeir sofi skemur. Félagsfræðikennarar sem rannsökuðu efnið telja að betri mötuneyti eða jafnvel fríar máltíðir í framhaldsskólum gætu dregið úr vinnu nemenda.

Þrír félagsfræðikennarar í Menntaskólanum í Kópavogi, Fjölbrautaskólanum við Ármúla og Kvennaskólanum tóku saman rannsóknina og var hún gerð lögð fyrir nemendur þessara skóla vorið 2005. Það sem kann að virðast mesta þversögnin í rannsókninni er sú að fólk sem vinnur meira en þrjátíu tíma á viku, það er í kringum fulla vinnuviku, fyrir utan vinnuálag í skólanum sýnir betri námsárangur en fólk sem vinnur minna eða jafnvel ekkert.

Garðar Gíslason og Hannes Ólafsson, sem unnu rannsóknina ásamt Björk Þorgeirsdóttur, segja að þeir nemendur sem vinni meira séu oft eldri og lengra komnir í námi. Þeir eru oft á tíðum einnig í meira námi og taki á því af meiri festu og ábyrgð. Þetta er einnig þekkt hjá nemendum sem stundi íþróttir eða aðra tómstundaiðju af kappi; þeir sem hafi meira að gera, þeir skipuleggi sig betur.

Það sem flestir nemendurnir virðast eyða peningunum í er matur og skyndibitar. Hannes segir að í sumum skólum séu bara sjoppur sem ekki selji endilega kjarngóðan mat og auk þess séu tíðum langar raðir. Nemendur leiti því annarra og dýrari valkosta. Því gætu betri mötuneyti og jafnvel fríar máltíðir dregið úr þeim útgjaldalið framhaldsskólanema.

Garðar nefnir einnig að stúlkur vinni meira með framhaldsskólanum en strákarnir en telur ekki að það sé vegna þess að stúlkur séu dýrari í rekstri en karlkyns jafnaldrar þeirra. Hann segist hafa fundið á samtölum við nemendur sína að sumarlaun stúlkna séu lægri en strákanna og því þurfi stelpurnar að vinna meira með skólanum en strákarnir. Strákarnir fái oft betur launaða vinnu sem stelpunum standi ekki til boða, til að mynda malbikun eða byggingarvinnu.