Íslandsvinir með nýja plötu

Bandaríska hljómsveitin Ratatat er að fara að senda frá sér sína aðra breiðskífu í mánuðinum en henni hefur verið beðið með mikilli eftirvæntingu. Steinþór Helgi Arnsteinsson kynnti sér sögu sveitarinnar og efni nýju plötunnar.

Dúettinn Ratatat var stofnaður í Brooklyn hverfi New York borgar árið 2001 en meðlimir sveitarinnar, þeir Mike Stroud og Evan Mast, höfðu lengi fyrir það verið að aðhafast í tónlistargeiranum. Meðal annars hefur Stroud spilaði og leikið með emo-rokk sveitinni Dashboard Confessional. Hljómsveitin hét í upphafi Cherry en seinna var nafninu breytt í Ratatat. Cherry nafnið fékk þó að lifa aðeins lengur og þá sem nafnið á lokalagi fyrstu plötu Ratatat.

Fengu plötusamning hjá XL plötufyrirtækinu

Þó svo að Stroud og Mast hafi verið að skiptast á hugmyndum, hljóðum og tónum í tvö ár byrjuðu hjólin ekki fyrst að snúast fyrr en í lok árs 2003. Þá kom út smáskífan Seventeen Years hjá plötufyrirtæki Mast og bróður hans, Audio Dregs, sem vakti athygli innan tónlistarheimsins og varð til þess að Ratatat skrifaði undir samning hjá plötufyrirtækinu XL recordings. Þeir hjá XL endurútgáfu Seventeen Years sem síðan hefur ómað á börum og diskótekum víða um heim. Á fyrri hluta árs, 2004, kom síðan loks út fyrsta breiðskífa Ratatat, samnefnd sveitinni. Hafa hitað upp fyrir Interpol og fleiri

Platan vakti mikla athygli meðal tónlistarmiðla víða um heim og hið skemmtilega samspil gítars og hljóðgervla við sönglausa og afar dillivæna hip-hop takta í anda Daft Punk virtist virka vel innan um diskó-pönk bylgjuna sem þá ríkti. Hljómsveitin vakti ekki bara hrifningu meðal tónlistarpressunnar heldur einnig hjá tónlistarmönnum hvaðanæva af.

Fékk Ratatat þá tækifæri til þess að hita upp fyrir ekki ómerkari hljómsveitir en Interpol, Clinic, Franz Ferdinand, Tortoise og The Killers. Íslendingar hafa einmitt fengið að kynnast Ratatat á tónleikum en þeir spiluðu á Airwaves hátíðinni í fyrra við mikla gleði áhorfenda, sem gjörsamlega trylltust þegar Seventeen Years var spilað. Ógleymanlegt augnablik.

Ný platan klassísk

Eftir tveggja ára bið er loks von á nýrri plötu frá Ratatat. Hún mun bera nafnið Classics og kemur út þann 22. ágúst næstkomandi. Við fyrstu hlustun virðist platan vera rökrétt framhald fyrstu skífunnar þar sem Mast og Stroud hafa þroskast en ekki tapað sköpunargleðinni. Í nýlegu viðtali sagði Mast að meginmunurinn á plötunum tveimur væri að nú hefði þeir fengið mun meiri tíma, pláss og tæki til þess að vinna að plötunni. Litlu hlutirnir eru það sem gera plötuna að því sem hún er... öðruvísi hljóð, öðruvísi hugmyndir. [...] Ég held að fólk sem þekki fyrri plötuna eigi eftir að vera hissa.

Fyrsta smáskífan af nýju plötunni, Wildcat, er nú þegar komin út og það verður að segjast alveg eins og er að þar er á ferð partíslagari af bestu gerð, óvæntur og kraftmikill. Hægt er að hlusta á lagið á síðunni www.myspace.com/ratatatmusic. Síðan er bara að bíða og sjá hvernig viðbrögðin við nýju plötunni verða en fólk má alveg búast við því að sjá og heyra mun meira frá hljómsveitinni Ratatat á komandi misserum.