Gisele Bündchen hætt í fyrirsætubransanum

Ofurfyrirsætan Gisele Bündchen hefur gefið út yfirlýsingu þess efnis að hún sé endanlega hætt störfum sem fyrirsæta. Þetta mun vera vegna þess að hún segist vera orðin þreytt á óreglulegum lífsstíl sem fylgir fyrirsætustörfunum. „Það er komið nóg. Ég er búin að fá mig fullsadda af því að ganga fram og aftur á tískupöllunum,“ segir Gisele, sem síðustu árin hefur verið eitt heitasta nafnið í fyrirsætubransanum.

Þessari brasilísku fegurðardís finnst ekki gaman lengur að hlaupa milli stílista og vera með hárblásarann yfir sér allan daginn, einnig kvartar hún yfir því að síminn hennar stoppi aldrei. Hún mun þó taka að sér einstaka verkefni fyrir vini sína eins og hún greinir sjálf frá. Bündchen, sem fær meira en sjö milljónir á tímann í fyrirsætustarfinu, ætlar að einbeita sér að leiklistinni og hefur skrifað undir sérstakan auglýsingasamning við Dolce & Gabbana.

Gisele var um tíma kærasta leikarans Leonardo DiCaprio og skaut það henni ærlega upp á stjörnuhimininn. Voru þau búin að vera saman í nokkur ár áður en þau létu sjá sig saman opinberlega. Slúðurblöðunum ber þó ekki saman um þessar mundir því sumir álíta að skötuhjúin séu á leið upp að altarinu á meðan aðrir velta fyrir sér sambandi DiCaprio við breska sjónvarpsstjörnu.