Alagna með eigin tónleika fyrir utan La Scala

Hetjutenórinn Roberto Alagna, sem rauk af sviði La Scala óperunnar í Mílanó í vikunni eftir að baulað var á hann úr salnum, hélt sína eigin sýningu fyrir utan óperuhúsið í kvöld meðan sýningin á Aidu fór fram innandyra án hans. Hann hefur hótað að kæra Scala óperuna ef hann verði ekki tekinn inn í sýninguna á ný.

Alagna kom á torgið fyrir framan óperuhúsið skömmu áður en sýningin átti að hefjast og söng þar fyrir alla sem vildu hlýða á. Hinum franska Alagna hefur verið hampað sem "hinum nýja Pavarotti".

Hann kom fram eins og duttlungafullri óperustjörnu sæmir og setti á svið kveðjuathöfn fyrir óperuunnendur og aðra sem áttu leið um torgið. Meðal annars söng hann aríu úr Madame Butterfly þar sem textinn útleggst eitthvað á þessa leið "vertu sælt, blómum skrýtt vé hamingju og ástar." Þá tók hann mynd af óperuhúsinu á farsíma sinn og sagði við þá sem næst stóðu: "ég kom til að ná í minjagrip, mín síðasta fagra minning um Scala vegna þess að ég veit ekki hvenær ég mun sjá það á ný."