Vilja búsetuskyldu á lögbýli

Allt að tíföld hækkun jarðaverðs á undanförnum árum er farin að ógna hefðbundnum landbúnaði á Suðurlandi. Dæmi eru um að boðnar séu á milli tvö- og þrjúhundruð milljónir króna í einstaka jarðir. Oddvitar Hrunamannahrepps og Rangárþings eystra telja tímabært að menn hugi að því að setja búsetuskyldu á öll lögbýli.

Bændur á Suðurlandi voru á fullu í vorverkunum í dag og nýttu hlýindin, um og yfir 20 stiga hita, til að plægja akrana og sá korninu. En þeir hafa um fleira að hugsa því þessa dagana berast inn um póstlúgur sunnlenskra sveitabæja bréf frá mönnum sem vilja kaupa bújarðir.

Í Hreppunum hafa menn séð verðið rjúka upp. Sigurður Ingi Jóhannsson, oddviti Hrunamannahrepps, segir að jarðaverðið hafi allt á tílfaldast á sl. 5-10 árum og ekkert lát sé á verðhækkunum.

Lögmenn á Suðurlandi hafa sent um tvöþúsund jarðeigendum allt austur að Hornafirði bréf þar sem vakin er athygli bænda á mikilli ásókn í jarðir. Háar fjárhæðir eru nefndar. Ólafur Björnsson lögmaður tekur sem dæmi að tilboð upp á 200-300 milljónir króna væru í gangi í landstóra jörð í Grímsnesi. Hann segir að það sé fjölbreyttur hópur fólks sem leitar eftir jarðakaupum, þó séu fjárfestar kannski stærsti hópurinn, aðilar í byggingatengdum rekstri og þess háttar.

Oddviti Hrunamannahrepps segir ekki æskilegt að fyrir dreifbýlið ef mikið yrði um það að menn keyptu jarðir sem ætluðu sér ekkert með þær. Þeir tækju ekki þátt í mannlífi eða félagslífi í sveitinni, börnin þeirra gengju ekki í skóla og engin uppbygging væri á þeim jörðum.

Hann nefnir að víða í Skandinavíu sé búsetuskylda og það væri verulega íhugandi hvort ekki væri kominn sá tími að menn settu búsetuskyldu á öll lögbýli á landinu til þess að tryggja að þar væri starfsemi og líf. Oddviti Rangárþings eystra, Ólafur Eggertsson á Þorvaldseyri, tekur undir sjónarmið um að komið verði á búsetuskyldu.

Báðir telja oddvitarnir að þetta háa jarðaverð ógni hefðbundnum búskap. Ungt fólk sem ætli sér að stunda hefðbundinn búskap ráði ekki við þetta verð.