Sprengt við Háskóla Íslands

Sprengivinna við háskólatorg Háskóla Íslands hefst í vikunni þegar nemendur eru í miðjum prófalestri. Háskólayfirvöld segja ómögulegt að fresta framkvæmdunum fram yfir prófatörnina sem lýkur um miðjan maí.

Framkvæmdirnar hófust fyrir nokkrum vikum og er nú þegar mikil röskun á gönguleiðum á háskólasvæðinu og bílastæðum nemenda. Framkvæmdirnar koma sér verst fyrir nemendur í félagsfræði- og hagfræðideildum í Odda og lögfræðistúdenta í Lögbergi. Samkvæmt tilkynningu frá skólayfirvöldum verður sprengt allt að tíu sinnum á dag, frá átta á morgnana til níu á kvöldin.

Sigurður Örn Hilmarsson, formaður stúdentaráðs Háskóla Íslands segir ráðið hafa þrýst á um að nemendur fengju að klára prófatörnina áður en sprengivinnan hæfist. Það hafi þó verið talið ómögulegt miðað við verkáætlun sem gerir ráð fyrir að húsið verði tekið í notkun 1.des. 2007. Hann segir skólayfirvöld þó hafa komið til móts við þarfir nemenda á annan hátt, meðal annars með góðu upplýsingaflæði til nemenda og með því að auka lestraraðstöðu í byggingum sem eru fjær framkvæmdasvæðinu.

Engin próf eru þó í byggingunum sem liggja að framkvæmdasvæðinu heldur er prófað í KR-heimilinu og í Eirbergi við Landsspítalann. Nemendur sem NFS ræddi við sögðu lesturinn þó ekki hafa raskast mikið vegna hávaða en það gæti þó breyst þegar farið væri að sprengja.