Fagnar áformum um varanlega vegagerð

Verkalýðsfélag Húsavíkur  tekur heilshugar undir með þeim aðilum í Þingeyjarsýslum sem fagnað hafa áformum um varanlega vegagerð með Jökulsá á Fjöllum af hringvegi 1 niður á þjóðveg 85 í Kelduhverfi. Vegtengingin er mikilvæg varðandi frekari uppbyggingu í ferðaþjónustu á svæðinu jafnframt því sem tengingin gegnir ákveðnu hlutverki í atvinnu- og samgöngumálum eftir sameiningu fjögurra sveitarfélaga frá Húsavík til Raufarhafnar. Þetta kemur fram í ályktun verkalýðsfélagsins.

Verkalýðsfélag Húsavíkur harmar afstöðu stjórnar Landsverndar sem fram kemur í athugasemdum til Skipulagsstofnunar vegna fyrirhugaðrar vegagerðar. Verkalýðsfélagið hvetur skipulagsyfirvöld í landinu til þess að fallast á umrædda vegagerð vestan ár og samgönguyfirvöld til þess að tryggja fjármagn til verksins svo ljúka megi þessari mikilvægu vegtengingu sem allra fyrst, byggðarlaginu og vegfarendum til hagsbóta.