Frumkvöðull á flutningabíl

Þetta er kallnafnið í vinnunni hjá mér og ég er ekki þekktur undir neinu öðru nafni í þessum geira, segir vörubílstjórinn Jón Ívan Rafnsson, betur þekktur sem Johnny Rock.

Margir kannast við bílstjórann með skemmtilega nafnið enda þeytist hann landshlutanna á milli á stóra rauða vörubílnum sínum sem merktur er bak og fyrir - vinnunafninu Johnny Rock. Og það er ekki sökum að spyrja hvað Johnny Rock flytur grjóthnullunga og steina úr jarðvegsvinnu. Ég vinn fyrst og fremst við efniskeyrslu hjá GG, við að flytja grúsin, sand, grjót og það sem tilheyrir í lagnir og grunna.

Rock nafnið er samt ekki komið vegna grjótaflutninga. Ég er hálfur Frakki og mamma og pabbi kölluðu mig alltaf Johnny. Svo var það einn af vinum mínum, sem ég var vanur að skemmta mér með, sem kallaði mig rokkara. Honum fannst ég sennilega svo rokkaralegur enda er ég með nokkur húðflúr og nokkuð skrautlegur.

Johnny segist hafa fengið mikla athygli út af skiltunum enda hafi það verið tilgangurinn. Ég held að ég hafi verið fyrstur til að setja svona áberandi skilti á bílinn hjá mér. Ég hef líka gaman af því að vera öðruvísi og vil láta taka eftir mér. Ég er líka orðinn nokkuð þekktur á þjóðveginum og það er gaman þegar krakkarnir sem keyra framhjá fara að garga nafnið mitt. Svo horfir lögreglan líka alltaf á mig skrýtnum augum, segir Johnny sem man eftir nokkrum skiltum sem aðrir vörubílstjórar hafa sett upp. Það voru skilti á borð við Naglinn og Kallinn en ekkert þeirra var svona óvenjulegt eins og skiltin mín. Ég held að ég sé skrautlegastur í þessum bransa og það er aldrei að vita hvað ég geri næst. Kannski merki ég húddið eða toppinn á bílnum ég bæti reglulega við mig, segir Johnny Rock, sem ekur um á einum flottasta vörubíl landsins.