Fönkkóngurinn orðinn fullorðinn

„Ég hef nú alltaf verið tvöfaldur karakter, hef bæði starfað í markaðsmálum og í skemmtanabransanum. En það rétt, nú er ég kominn í PR-ið,“ segir plötusnúðurinn og athafnamaðurinn Baldur Baldursson, sem hóf nýverið störf hjá almannatengslafyrirtækinu Inntaki.

Baldur hefur getið sér gott orð hjá yngri kynslóðinni sem umsjónarmaður Fönkþáttarins á X-inu 977, plötusnúður á skemmtistöðum og í skipulagningu viðburða á skemmtistöðum. Þar að auki var Baldur, eða Balli eins og hann er jafnan kallaður, einn stofnenda og eigenda tímaritsins Vamm og þar áður var hann markaðsstjóri Undirtóna. Auk nýja starfsins er Baldur orðinn sendiherra Reyka vodka á Íslandi og sér um kynningu á þeim íslenska drykk hérlendis.

„Ég er búinn að vera hjá Inntaki í tvo mánuði. Þetta er að mörgu leyti svipað því sem ég hef verið að gera, bara á öðruvísi forsendum,“ segir Baldur, sem hefur alls ekki skipt alfarið um ham þó hann sé farinn að vinna hjá virðulegu fyrirtæki. „Nei, þeir sögðu við mig að ég ætti bara að vera ég sjálfur. Þeir vildu alls ekki að ég reyndi að vera eitthvað sem ég er ekki. Það vantaði einhvern yngri mann í fyrirtækið og ég hef auðvitað mikla reynslu úr afþreyingarheimi yngri kynslóðarinnar.“

Athygli vekur að Baldur er þegar farinn að klæða sig í samræmi við nýja starfið. Sá klæðnaður passar ekki beint við Balla fönk, útvarpsmann og plötusnúð, sem þó er vissulega enn við lýði. „Maður varð auðvitað að „súta“ sig upp. Manni væri nú varla vel tekið á fundum úti í bæ ef maður færi að mæta í Stüssy-bol,“ segir Baldur Baldursson, markaðsmaður, plötusnúður og útvarpsmaður.