Ævarandi friðarboðskapur

Árleg kertafleyting til minningar um fórnarlömb kjarnorkusprenginanna í Hírósíma og Nakasaki fer fram við Reykjavíkurtjörn í kvöld.

"Þetta er í 22 annað sinn sem kertafleytingin fer fram en það eru nokkur samtök sem sameinast um þennan viðburð," segir Steinunn Þóra Árnadóttir, einn af skipuleggjendum fleytingarinnar, "segja má það sé ákveðinn kjarni ár eftir ár en öll félagasamtök sem hafa áhuga á að leggja þessu málefni lið er velkomið að setja sig í samband við okkur og taka þátt. Það eina sem sem þarf er að vera friðarsinni og trúa á málefnið." Félögin sem standa að fleytingunni í kvöld eru Friðarhópur leikskólakennara, Friðar og mannréttindahópur BSRB, Menningar og friðarsamtök íslenskra kvenna, Samtök herstöðvaandstæðinga og Friðarhópur búddista en fundarstjóri verður Freyr Eyjólfsson.

Andrúmsloftið við tjörnina er mjög hátíðlegt og Steinunn segir að stundin sé jafnan mjög falleg og tilfinninganæm. "Þetta er mikið sjónarspil en líka sorgleg stund í ljósi minningarinnar um fólki í Hírósíma sem varð fyrir kjarnorkueldunum og kastaði sér logandi í ána. Það eru skelfileg hugrenningatengsl og því mjög táknrænt að fleyta kertum."

"Við teljum mikilvægt að tengja þetta við samtímann og því mun Guðrún Margrét Guðmundsdóttir mannfræðingur vera aðalræðumaður kvöldsins en hún mun meðal annars ræða um ástandið í Líbanon. Þess er til dæmis vert að minnast að vitað er að Ísrelsmenn ráða yfir kjarnorkuvopnum," segir Steinunn.

Guðrún Margrét kveðst munu ræða um stríðsmenningu í samhengi við Hírósíma og Líbanon í kvöld. "Það eru þær hugmyndir um beinlínis sé hægt að leysa vandamál með því að drepa saklaust fólk, og hvaðan slíkar hugmyndir koma. Friðarsinnar eru oft álitnir óraunsæir draumóramenn en í raun er það óraunsæi að vera stríðsglaður," segir hún og bendir á að stríðshugmyndirnar, líkt og þær sem eymi hvað sterkast af hjá núverandi ríkisstjórn Bandaríkjamanna geri óvin úr 1,2 milljörðum múslima með því að að tengja sífellt saman hugmyndir um hryðuverk og Íslam. "Hvaða skynsemi og raunsæi er í því?" spyr Guðrún Margrét.

Hún segir enga brú vera í framgöngu Ísraelsmanna í Líbanon. "Þetta mun sannarlega ekki skila þeim meira öryggi heldur auka á ólguna og staðfesta það sem Líbanir almennt eru að upplifa, allt frá venjulegum múslimum sem flestir eru eins og ég og þú, hafa sína trú sem eru langt frá því að vera einhverjar öfgaskoðanir, þau fá skilaboð um að þau séu eðlilegur fórnarkostnaður í stríði."

Steinunn Þóra bendir á að fólk sé vinsamlegast beðið um að mæta snemma í athöfnin við Tjörnina er allra jafna fremur stutt. Líkt og fyrri ár verða flotkerti og friðarmerki seld á staðnum. "Við verðum með extra mikið að kertum í kvöld því undanfarin ár hafa þau hreinlega klárast. Svo viljum við endilega hvetja fólk til að koma með börnin sín, það er yndislegt að sjá fjölskyldurnar mæta saman. Þetta er líka gott tækifæri til þess að tala við börnin um það sem er miður gott í heiminum en í fallegu og öruggu umhverfi," segir Steinunn.

Kertafleytingin við Reykjavíkurtjörn hefst kl. 22.30 í kvöld en á sama tíma verður kertum einnig fleytt á Akureyri, á flötinni fyrir framan minjasafn bæjarins en ræðumaður þar verður Ragnar Stefánsson jarðskjálftafræðingur.