Blautt stríð í aðsigi

Sjónvarpsauglýsingar sem sýna hlaupandi strák eða stelpu flýjandi undan myndavélinni eins og í góðri hryllingsmynd hafa verið tíðir gestir á skjánum. Ekki kemur í ljós hvað er verið að auglýsa en heimasíða er gefinn upp í lokin. Það er heimasíðan www.gegndrepa.is. Við nánari skoðun á síðunni kemur í ljós að um er að ræða leik sem fer af stað á næstunni. Allt er þetta mjög leynilegt og stjórnandi og einráður dómari leiksins nefnir sig Herra X.

Þetta er allt saman mjög leynilegt og við vitum mjög lítið um þetta. Lútum bara skipunum frá Hr. X, segir Karl Lúðvíksson, framleiðslustjóri hjá Spark ehf. sem sér um að útvega myndatökulið til að taka upp vatnsstríðið en síðan verða settir saman þættir sem verða sýndir á Skjá einum á næstunni í raunveruleikastíl. Það hafa verið svona leikir í gangi á netinu en þetta er í fyrsta sinn sem slíkir þættir verða sýndir í sjónvarpi. Leikurinn gengur út á það að keppendur fá í hendurnar upplýsingar um einhvern ákveðinn einstakling. Sá einstaklingur er einnig keppandi í leiknum og á keppandinn að reyna að skjóta hann niður með vatnsblöðru eða vatnsbyssu. Ef það tekst er einstaklingurinn úr leik og keppandinn fær nýtt skotmark. Tuttugu keppendur fá að vera með og sá sem nær að koma öllum sínum skotmörkum úr leik stendur uppi sem sigur­vegari. Verðlaunin eru ekki af verri endanum en sigurvegarinn fær hálfa milljón í hendurnar.

Við erum nú þegar búnir að fá í hendurnar fjöldann allan af umsóknum frá fólki allt upp í fimmtugt en við áframsendum þær á Hr. X sem sér um að velja keppendur, segir Karl Lúðvíksson en hann vill lítið tjá sig um leikinn enda fá hann og aðrir á Spark ehf bara skipanir daglega frá Hr. X og vita því lítið fram í tímann.