Bjöllukjóll Bjarkar til sýnis

Bjöllukjóllinn sem Björk Guðmundsdóttir klæddist í myndbandinu við lagið Who Is It, af plötunni Medúllu, er til sýnis í Gallerí Humar og frægð/Smekkleysubúðinni Klapparstíg 25. Kjólinn, sem er prýddur ótal mörgum bjöllum, er hannaður af Björk og hinum heimsfærga hönnuði Alexander McQueen.

„Það er mikið af munum úr nútíma dægurmenningu í Smekkleysubúðinni, þar á meðal þessi kjóll,- segir Einar Örn Benediktsson. „Kjólinn kom til landsins í byrjun árs en er nú til sýnis.“

Einar Örn segir að kjóllinn sé níðþungur og í raun þurfi ofurmenni eins og Björk til að bera hann. „Ég hef mátað hann og hann fór mér vel. En ég gat ekki haldið honum uppi - ég varð móður á því að vera í honum,“ segir Einar Örn.