Fjarskipti á Vestfjörðum í ólagi

Ástandi fjarskiptamála í dreifbýli á Vestfjörðum er líkt við ástand í vanþróuðum ríkjum í greinargerð sem Fjórðungssamband Vestfirðinga vann. Frá áramótum hefur ljósleiðari sem liggur um Vestfirði rofnað tvisvar. Greinargerðin var send Byggðastofnun, en þar var fjallað um framkvæmd byggðaáætlunar 2002 til 2005. Í greinargerðinni kemur fram að lélegt fjarskiptasamband við Vestfirði dragi úr samkeppnishæfni fyrirtækja á svæðinu og að ljóst sé að fyrirtæki og einstaklingar í fjórðungnum standi höllum fæti þegar kemur að öryggi í gagnaflutningum, þar sem vestfirðir eru eini landshlutinn sem ekki búi við hringtengingu ljósleiðarans. Ef landshlutinn á að geta laðað til sín samkeppnishæf fyrirtæki og stutt við uppbyggingu núverandi og nýrra fyrirtækja þurfi grunngerðin að vera í lagi. Þá er slæmt GSM samband á þjóðvegum vestfjarða einnig gagnrýnt. Að sögn Aðalsteins Óskarssonar framkvæmdastjóra fjórðungssambandsins var lagt í mikla vinnu, ásamt fyrirtækjum og stofnunum, við greinargerðina. Hann sagði að síðan þá hafi Síminn svarað og bent á að þeir séu að vinna í því að byggja upp sambandið. Hann sagðist gera sér grein fyrir því að verið væri að vinna í því t.d. í ríkistjórninni að efla GSM samband á landinu öllu. Hann sagði að í dreifbýli væri staða fólks talsvert öðruvísi og verrri, bæði hvað varðar ISDN og GSM samband, heldur en fólks í þéttbýli. Hann telur sig ráða af svörum Símans að lagfæringar verði gerðar og að verið sé að vinna í þessu hjá þeim. Hann segir Símann hafa fullyrt að breytingar verði á næstu mánuðum.