Byggð eykst enn í Kópavogi

Hafist verður handa við byggingu fyrstu fjölbýlishúsanna við Lund í Kópavogi innan nokkurra vikna. Skammt frá munu tvö önnur hverfi rísa á næstu árum, það er á Kópavogstúni og bryggjuhverfi við Fossvoginn. Mynd Kópavogs hefur breyst mikið frá árinu 1994 þegar ekkert hús hafði verið byggt austan Reykjanesbrautar. Þar hafa nú risið tvö ný hverfi og eru tvö hverfi til viðbótar í uppbyggingu. En breytingar verða líka í grónum hverfum á næstu árum. Hús hafa verið rifin á landi Lundar í og verður hafist handa við byggingar þar í lok ágúst eða byrjun september. Gert er ráð fyrir 394 íbúðum sem í munu búa um 1200 manns. Gunnsteinn Sigurðsson bæjarfulltrúi segir skipulag þar verulega breytt frá upphaflegu hugmyndinni. Mikil andstaða hafi verið við henni og hugmyndinni því einfaldlega hent. Þá er verið að undirbúa átta hektara stórt byggingasvæði í vesturbæ Kópavogs við Fossvoginn en fimm hektarar svæðisins verða á landfyllingu. Þar er gert ráð fyrir um 390 íbúðum. Spurður hvort tekist hafi að skipuleggja svæðið í sátt við þá sem þar búa fyrir segir Gunnsteinn að reynt hafi verið að taka eins mikið tillit til þeirrar byggðar sem fyrir sé eins og frekast sé kostur. Mörg hús hafi t.a.m. verið lækkuð frá því sem var í upphaflegri hugmynd. Upphaflega stóð til að hæstu húsin yrðu fimm hæða en eftir mótmæli íbúa hefur verið ákveðið að ekkert húsanna verði hærra en fjöggurra hæða. Breytingarnar munu jafnvel ná með tímanum vestast á Kársnesið þar sem íbúðarbyggð hefur blandast iðnaðarhverfi. Gert hefur verið ráð fyrir nýtískulegri smábátahöfn við bryggjuhverfið. En að fleiru er unnið á grónum bæjarhlutum og hefur verið valin ein tillaga af fjórum um skipulag á Kópavogstúni þar sem Landsspítalinn í Kópavogi stendur nú. Höfundru hennar er Benjamín Magnússon sem hefur svo gert tillögu að deiliskipulagi á því svæði. Það verður kynnt fyrir íbúum í ágúst. Þar er gert ráð fyrir um 300 íbúðum og verður hluti þeirra sérbýli þannig að íbúar þar verða um eitt þúsund talsins.