Samið við Eimskip um Herjólf

Samningaviðræður á milli Eimskipa og Vegagerðarinnar vegna reksturs á Herjólfi eru að hefjast. "Það verður gengið út frá tilboðinu og ekki verið að semja umfram það," segir Kristín Sigurbjörnsdóttir, framkvæmdastjóri stjórnsýslusviðs Vegagerðarinnar. Kristín segir að vonandi verði gengið til samninga fjótlega. "Þeir ætla að fá að skoða skipið og eins og venja er munum við kanna fjárhagsstöðu fyrirtækisins. Ef þetta er allt í lagi verður gengið til samninga." Í útboði Vegagerðarinnar átti Eimskip lægsta tilboðið, bæði hvað snertir grunnáætlun 1, sem gerir ráð fyrir þrettán ferðum á viku og grunnáætlunum 2 sem gerir ráð fyrir fjórtán ferðum. Í áætlun 1 bauð Eimskip 921.775.000, sem er 63,9 prósent af áætluðum verktakakostnaði. Í áætlun 2 bauð Eimskip 984.480.000, sem er 64,2 prósent af áætluðum verktakakostnaði. Tilboð voru opnuð 6. september. Höskuldur Ólafsson, framkvæmdastjóri Eimskip Skipafélags, segir litlar breytingar fyrirhugaðar á rekstri Herjólfs, þar sem reksturinn sé mjög njörvaður niður í útboðinu. "Það verður væntanlega samið til fimm ára, en það er ákvæði í tilboðsgögnum um að ef á kemst samningur um breytingar á öðrum samgögnulausnum til Vestmannaeyja, er hægt að segja samningnum upp á miðju tímabilinu." Ef samningar takast milli Eimskipa og Vegagerðarinnar mun Eimskip taka við rekstri Herjólfs í byrjun næsta árs. Samskip, sem nú rekur Herjólf, átti næst lægsta tilboð í báðar áætlanir. Einnig skilaði Samskip inn fjórum frávikstilboðum, en Kristín segir að ekki verði litið til frávikstilboðanna, þar sem þau fela í sér breytingu á útboðsgögnum. Frávikstilboð séu einungis gild feli þau í sér breytingar á tækni. Fyrir liggur að ferðum Herjólfs muni fjölga verulega, frá því að vera 590 ferðir á ári í 670 eða 720 ferðir.