Rauði Krossinn býður heimsóknarþjónustu

Þeir sem þarfnast vina geta haft samband við Rauða krossinn sem sér um heimsóknarþjónustu. Í sambandi við fréttaröð Stöðvar 2 um einstæðinga tókum við hús á konu sem á fáa að og fær því heimsókn sem bæði hún og gestur hennar hafa gaman af.

Í fréttum okkar síðustu viku höfum við nokkuð fjallað um einstæðinga, fólk sem fáa eða jafnvel enga að. Rauði krossinn rekur heimsóknarþjónustu sem er sérstakt átaksverkefni en þjónustun felst meðal annars í því að fólk gerist heimsóknarvinir og fer einu sinni í viku til þeirra sem þarfnast vina. Fyrir tveimur árum ákvað Ásdís Ingimundardóttir að gerast heimsóknarvinur og Halldóra Petra Oddsdóttir varð gestgjafi hennar.

Eftir að eiginmaður Halldóru lést árið 1991 breyttist líf Halldóru og hún varð mikið ein. Saman áttu þau kjördóttur, þannig að Halldóra á barnabörn og langömmubörn sem heimsækja hana. En Halldóra segir mikið að gera hjá fólkinu sínu eins og gefur að skilja og það leynir sér ekki að hún er mikil félagsvera. Það var svo fyrir nokkru að Halldóra hætti að keyra eftir að hún keyrði utan í bíl og við það einangraðist hún mikið.

Halldóra sagði margar skemmtilegar sögur á meðan heimssókn okkar stóð í dag. Hún segist alltaf hlakka mikið til heimsókna Ásdísar en yfirleitt fara þær saman í bílferð og kíkja í búðir og eyða peningingum eins og Halldóra orðaði það, en hún mælir eindregið með heimsóknarþjónustunni.

Fjörtíu sjálfboðaliðar eru í heimsóknarþjónustunni í Kópavogi en þar er þjónustan með þeim öflugri. Áður en fólk gerist heimsóknarvinur fer það þó á ýmis námskeið eins og skyndihjálp til að vera sem best undirbúin.