Fyrst á dagskrá eftir fimmtíu ár?

Gísli Marteinn Baldursson segir að byggð í Akurey og Engey komist fyrst á dagskrá eftir hálfa öld. Byggð í eyjunum var í sumar kynnt sem aðalstefnumál Sjálfstæðisflokksins í komandi borgarstjórnarkosningum.

"Borgin við Sundin." Þetta átti að verða réttnefni á Reykjavík samkvæmt tillögu Sjálfstæðismanna, sem lögð var fram á blaðamannafundi í sumar. Vilhjálmur Þ Vilhjálmsson kallaði þetta tillögu um Betri borg þegar hugmyndin var kynnt í vor.

En þetta sagði Gísli Marteinn Baldursson um málið í Silfri Egils í morgun. "Ef við ætlum að setja 15 þúsund manns í Vatnsmýrina, 10 þúsund í Geldinganes og þétta byggð enn frekar annars staðar, þá erum við kominn upp í þetta 30 þúsund. Af hverju ættum við þá að fara út í Engey?"

Tillögur að byggð úti á eyjum - í Örfirsey, Akurey, Engey og jafnvel Viðey - áttu að vera kjarninn í jákvæðri tillögugerð Sjálfstæðismanna fyrir kosningar næsta vor. En jafnvel Vilhjálmur Þ. Vilhjálmsson oddviti Sjálfstæðismanna í borgarstjórn virtist í dag vera farinn að draga í land.

Vilhjálmur Þ. Vilhjálmsson, mótframbjóðandi Gísla Marteins í prófkjöri Sjálfstæðisflokksins, sagði rétt hjá Gísla að ekki þurfi að fara í Eyjabyggðina fyrr en eftir á þriðja tug ára eða svo.