Álfar og tröll atvinnuskapandi

Álfar, tröll og norðurljósin gætu orðið Stokkseyringum féþúfa ef áform um þjóðfræðisafn verða að veruleika. Sunnlenska fréttablaðið greinir frá kaupum 1200 fermetra húsnæðis í þessu skyni þar sem Hólmaröst er með fiskvinnslu, en hún flytur í Þorlákshöfn í byrjun næsta árs. Haft er eftir Benedikti G. Guðmundssyni, forsvarsmanni félagsins um þetta safn, að það gæti gefið Sunnlendingum forskot í málefnum tengdum þjóðfræði og menningartengdri ferðaþjónustu, ef vel tekst til.

Bein og óbein áhrif af Álfa, trölla og norðurljósasafni ásamt Draugasetri og því sem fyrir er gæti orðið lyftistöng fyrir svæðið í heild og skapað ný störf í tengslum við útgáfustarfsemi, þýðingar, minjagripagerð og þjónustu. Spilað verður af fingrum fram við hönnun og helst ekki stuðst við teikningar heldur innblástur.