Áhyggjur af hátæknigreinum

Ekki hefur verið rannsakað hvað mörg störf hafa flust úr landi vegna hás gengis krónunnar, eða hver áhrifin eru fyrir efnahagslífið í heild. Þetta segir Sveinn Hannesson, framkvæmdastjóri Samtaka iðnaðarins. "Þar skiptir öllu máli hvort fólk sem missir vinnuna, fær vinnu aftur sem eru arðbærari en þau sem fyrir voru. Ef það fer á atvinnuleysisbætur eða fær vinnu sem ekki er eins arðbær er það tjón. Það er full þörf á að kanna hér hvert fólk hefur farið sem hefur misst vinnuna og hver kjör þeirra eru eftir breytingu." Sveinn segir að Íslendingar þurfi að hafa mestar áhyggjur af störfum sem við ættum að geta haldið í og þurfum mest á að halda, til dæmi í hátæknigreinum þar sem eru há laun og mikil verðmætasköpun. Það hafi því verið slæmt þegar Marel ákvað að reisa heldur nýja verksmiðju í Slóvakíu en í Garðabænum. Við gleðjumst yfir útrás íslenskra fyrirtækja, en hörmum þegar störfin fara úr landi en í raun séu þetta tvær hliðar á sama peningi. Hægt væri að lifa við sterka stöðu krónunnar í stuttan tíma, en nú hafi þetta varað í þrjú ár og ekki sjái fyrir endan á ástandinu. "Við sáum þróunina fyrir, en þenslan byrjaði fyrr en nokkur átti von á vegna mikilla væntinga." Fyrir iðnað í landinu segir Sveinn að engin önnur varanleg lausn sé fyrir hendi en að taka upp Evruna til að losna við sveiflur. "Þannig að hér sé hægt að ráðast í framkvæmdir án þess að gengið fari úr skorðum. Nú er líf og heilsa samkeppnsatvinnugreinanna komið í hendur á spákaupmönnum og við þurfum að koma okkur úr þeirri stöðu með því að taka upp stærri og stöðugri gjaldmiðil. Það liggur beint við að það sé Evran. Það skiptir máli að draga úr viðskiptakostnaði og lækka vexti. Upptaka Evru er því mjög heppileg fyrir þá sem kaupa og selja að langmestu leyti í Evrum. Á evrusvæðinu verða menn mun minna varir við slíkar sveiflur."