Kjötmjöl unnið í Flóanum á ný

Á mánudaginn hefst á ný vinnsla í kjötmjölsverksmiðju Kjötmjöls í Hraungerðishreppi, en henni var lokað í apríl þar sem ekki þótti grundvöllur fyrir rekstrinum. Frá þeim tíma hefur sláturúrgangur á Suðurlandi verið urðaður. Torfi Áskelsson, verksmiðjustjóri Kjötmjölsverksmiðjunnar segir ákveðið hafa verið að Sorpstöð Suðurlands leigði reksturinn af KB banka. Sorpstöðin hættir að taka við sláturúrgangi til urðunar þegar verksmiðjan hefur starfsemi að nýju. "Og við hækkum móttökugjaldið til að ná núllinu í rekstrinum," segir hann. KB banki keypti verksmiðjuna á nauðungaruppboði í fyrra og rak um sinn með tapi, á meðan beðið var eftir því að rekstur hennar yrði tryggður. Bankinn gafst upp á biðinni í vor og lokaði verksmiðjunni. Síðan þá hefur þurft að urða sláturúrgang á Suðurlandi, en verksmiðjan tekur við úrgangi frá Suðurlandi og höfuðborgarsvæðinu. Steinþór Skúlason, forstjóri Sláturfélags Suðurlands segir það þýða kostnaðarauka fyrir félagið þegar verksmiðjan fer í gang að nýju og hefur nokkrar áhyggjur af skekktri samkeppnisstöðu kjötvinnsla og sláturhúsa á landinu. "Þó svo að öll ráðstöfun og umhverfismál eigi að vera í lagi, þá þarf það að gilda alls staðar. Það má ekki skekkja samkeppnisstöðu fyrirtækja með því að við fáum á okkur kostnað upp á tugi milljóna sem samkeppnisaðilar annars staðar á landinu þurfa ekki að bera af því þar eru hlutir gerðir með einhverjum allt öðrum og ófullnægjandi hætti," segir hann og bætir við að ef móttökugjald verksmiðjunnar fyrir sláturúrgang verði óheyrilegt, þá muni félagið reyna að leita annarra leiða með förgun. "Það er ekki hægt að bjóða þessum atvinnurekstri á Suðurlandi upp á að hann eigi að búa við allt önnur starfsskilyrði en aðrir," segir hann. Kjötmjölsvinnslan verður með svipuðu sniði og verið hefur en afurðir verksmiðjunnar eru urðaðar því engir markaðir eru fyrir mjölið. Erlendir markaðir urðu að engu eftir að kúariða komst í hámæli og svo starfar verksmiðjan líka á sauðfjárriðusvæði. Torfi Áskelsson segir þó unnið verða að því að finna nýja markaði fyrir mjölið.