Kvenfélag nefnt eftir Maggnúsi

"Ég á mér nafna, kvenfélag á Selfossi, og er heiðursfélagi í því," segir Maggnús Víkingur Grímsson athafnamaður, sem sagði frá áhuga sínum á Kádiljákbifreiðum í Fréttablaðinu á laugardag. Marga lesendur rak í rogastans þegar þeir sáu Maggnúsarnafnið á prenti því hinn viðtekni ritháttur nafnsins er jú með einu géi. Upphaf þess að Maggnús fór að skrifa nafnið sitt með tveimur géum má rekja 38 ár aftur í tímann, þegar hann var sextán ára og hét bara Magnús eins og þúsundir annarra Íslendinga. "Ég vann þá í vélsmiðju í Þorlákshöfn og merkti hlutina sem ég smíðaði með stöfunum MAGG," segir Maggnús. Skömmu síðar hitti hann latínufróðan mann sem sagði honum að orðið magnus væti latneskt og þýddi "mikið". Upp frá því velti hann vöngum yfir hvers vegna orðið væri borið fram á annan veg en rithátturinn gaf tilefni til og afréð í framhaldinu að skrifa nafnið sitt með tveimur géum. Það varð ekki til að draga úr ákvörðuninni að útlendingar eru líklegri til að fara rétt með framburð Magnúsarnafnsins þegar géin eru tvö. Maggnús hefur lengi átt í samskiptum við útlendinga, ekki síst starfs síns vegna, en hann stóð lengi í innflutningi og framleiðslu á efni til garðskálagerðar. Maggnús er enn með einu géi í þjóðskrá en báða rithætti nafnsins er að finna í símaskránni. Er það öðrum til hægðarauka. Flestir sem skrifa nafn Maggnúsar gera það rétt, enda þekkja þeir kauða, en rithátturinn hefur alið af sér annað vandamál. "Ég skrifa oft nöfn annarra með tveimur géum af því að mér er það tamt," segir Maggnús og bætir við að sonur hans tíu ára sé farinn að skrifa föðurnafn sitt með tveimur géum og það án nokkurs þrýstings fá pabbanum. En Maggnús er ekki eini Maggnúsinn á landinu. "Þannig er að fyrir nokkrum árum frétti ég af góðum konum á Selfossi sem komu saman á veitingahúsi til að stofna kvenfélag. Ég hringdi í þjóninn og bað hann um að færa þeim hvítvínsglas með kveðju frá aðdáanda. Svo hringdi ég hálftíma síðar og lét færa þeim stjörnuljósakokkteil með kveðju frá Maggnúsi. Um það leyti voru konurnar að ákveða nafn á félagsskapinn og sögðu allar í kór að félagið skyldi heita Maggnús og slógu í borð." Maggnús var svo gerður að heiðursfélaga í kvefélaginu og er á leið til Kúbu með konunum í haust. Annars er að miklu að huga hjá Maggnúsi þessa dagana "Ég ætla að reisa millahverfi á Flúðum en ég bjó í fjórtán ár í hreppnum og er eiginlega kominn heim. Sveitungar mínir segja að nú sé Björgólfur kominn heim," segir Maggnús og hlær.