Engar reglur um ferðamenn í neyð

Þrátt fyrir miklar náttúruhamfarir og hryðjuverk á vinsælum ferðamannastöðum að undanförnu hafa íslensk stjórnvöld ekki gert neina aðgerðaáætlun um hvort eða hvernig staðið skuli að fólksflutningum við slíkar aðstæður. Ferðaskrifstofum er í sjálfsvald sett hvort þær bregðast við ef hryðjuverk verða á þeim slóðum sem Íslendingar dvelja. Dönsk stjónvöld hafa varað fólk við ferðalögum til Sínaí-skaga í Egyptalandi í kjölfar hryðjuverkaárásanna í Sherm-El-Sheik, en sjá hins vegar ekki ástæðu til að flytja á brott þá 700 Dani sem nú eru á svæðinu. Eigendur danskra ferðaskrifstofa eru æfir, tryggingar greiða ekki kostnaðinn sem af því hlýst að flytja fólkið heim fyrr en áætlað var og ferðaskrifstofurnar þurfa að borga brúsann. Þá kallar stjórnarandstaðan eftir aðgerðaráætlun sem tekur til slíkra aðstæðna, því í Danmörku er engin slík til, ekki frekar en hér. Magnús Harðarson formaður samtaka ferðaskrifastofueigenda segir enga slíka áætlun vera til og honum fannst eðlilegt að fara huga að því að gera slíkar ráðstafanir eða búa til reglur um hvernig haga skuli heimflutningi íslenskra ferðamanna. Í skilmálum Samtaka Ferðaþjónustunnar segir að ferðaskrifstofa beri enga ábyrgða á ófyrirsjáanlegum aðstæðum, sem hún fær engu um ráðið. Þetta ákvæði tekur til náttúruhamfara, stríðsátaka og hryðjuverka. Í skilmálunum er auk þess tekið fram að farþegi eigi ekki rétt til endurgreiðslu við slíkar aðstæður. Verði hryðjuverkaárás gerð á einhvern þeirra sumarleyfisstaða sem Íslendingar flykkjast til er ferðaskrifstofum því í raun í sjálfsvald sett hvort eða hvernig þær bregðast við. Magnús sagði að sú staða gæti komið upp að Íslendingar gætu orðið strandaglópar lentu þeir í þeim aðstæðum að hugsanlega hætta væri á ferðum á ferðalögum þeirra. Magnus gerir ráð fyrir að stjórnvöld grípi til viðeigandi ráðstafana. Einnig er ákvæði í skilmálum ferðaskrifstofa um að fólki sé ávallt heimilt að afturkalla pöntun vegna stríðsaðgerða, lífshættulegra smitsjúkdóma eða annarra hlistæðra tilvika og fá endurgreitt. Þetta ákvæði tekur þó ekki til mögulegrar hættu á hryðjuverkum, líkt og hótunum þeirra sem stóðu fyrir árásunum í London um að Ítalía og Danmörk væru næst. Magnús sagði slíkt ekki vera fyrir hendi á Íslandi í dag og taldi það erfitt þar sem ómögulegt væri að skipuleggja slíka flutninga þegar ekki væri um raunverulega atburði að ræða.