Fuglaflensa geti kostað iðnríkin 33 þúsund milljarða

Alþjóðabankinn segir að fuglaflensa gæti kostað hinar iðnvæddu þjóðir heims allt að 550 milljarða dollara, jafnvirði 33 þúsund milljarða íslenskra króna, ef hún yrði að faraldri og færi að berast á milli manna.

Í skýrslu sem bankinn birti um málið í dag kemur fram að á bilinu 100 til 200 þúsund manns gætu látist af völdum veikinnar í Bandaríkjunum einum og að landið yrði af sex til tólf þúsund milljörðum króna. Bankinn sagði hins vegar að það væri ekki við hæfi að reikna út hvert tapið yrði í þróunarlöndum þar sem heilbrigðiskerfi í þeim löndum væri ekki eins og gott og því mætti búast við mun fleiri dauðsföllum þar en hjá ríkari þjóðum.

Skýrsla Alþjóðabankans verður lögð fram á fundi sérfræðinga í heilbrigðismálum í Genf þar sem ræða á leiðir til að takast á við fuglaflensufaraldur ef hann kemur upp.