Rúmlega 100 manns í hrakningum

Rúmlega hundrað manns í u.þ.b. þrjátíu bílum lentu í hrakningum á þjóðveginum í Vestur-Húnavatnssýslu í gærkvöldi þegar óveður skall þar á eins og hendi væri veifað. Mikil snjókoma fylgdi hvassviðrinu þannig að ekkert skyggni var og fljótlega fór að hlaða í skafla. Allar björgunarsveitir á svæðinu voru kallaðar út og stóðu björgunarmenn í ströngu í þónokkrar klukkustundir við hinar verstu aðstæður við að ná fólki úr bílunum og flytja það í Víðihlíð, á Hvammstanga og að Laugabakka þar sem fólkið fékk aðhlynningu eftir atvikum og gisti í nótt. Ekki er vitað til þess að neinn hafi sakað eða orðið meint af volkinu en einn árekstur varð þegar flutningabíll ók á tvo kyrrstæða fólksbíla við Hvammstangaafleggjarann. Veðrinu slotaði heldur upp úr miðnætti og vegagerðarmenn hófu að ryðja norðurleiðina eldsnemma í morgun, þrátt fyrir slæmt veður sumstaðar, en erfitt er um vik vegna fastra fólksbíla út um allt.