Stígamót kæra BM ráðgjöf

Ólafur Geirsson, stjórnarformaður BM ráðgjafar, segir málið byggt á misskilningi. „Það er ekkert sem liggur ekki opið hjá okkur. Við gefum út greiðsluseðla og erum með númerabirtingu á símum sem hringt er úr frá okkur.“ Ólafur segir að þeir starfsmenn sem hringdu umrædd símtöl hafi starfað lengi hjá fyrirtækinu og að telja megi útilokað að starfsmennirnir hafi sagst vinna fyrir Stígamót. „Það er enginn sem getur hafa haft einhvern fjárhagslegan ávinning af því að blekkja svona,“ segir Ólafur. Aðspurður hver skýringin á málinu sé segir Ólafur það geta komið fyrir að fólk tengi umrædda söfnun við Stígamót þar sem málefnin séu lík. „Við biðjum þá afsökunar sem telja sig hafa fengið rangar  upplýsingar,“ segir Ólafur. Hann segir BM ráðgjöf tilbúna að draga greiðsluseðlana til baka ef þessir einstaklingar gefi sig fram. Ólafur vill enn fremur leggja áherslu á að fyrirtækið hafi átt í góðu samstarfi við forsvarsmenn átaksins Blátt Áfram og hafi aldrei starfað fyrir Stígamót. Guðrún Jónsdóttir, talskona Stígamóta, segir samtökin nú þegar hafa fengið fjórar tilkynningar þess efnis að verið væri að misnota nafn Stígamóta. „Við vitum ekki alveg umfangið á þessu. Það verður bara að skoða það í rólegheitunum.“ Aðspurð hvort tekið hafi verið fram í símtölunum að hringt væri á vegum Stíga­móta segir Guðrún að svo hafi verið „Í því liggur alvarleikinn,“ segir Guðrún: „Vonandi var þetta ekki meira en þetta en það er nóg til að við að sjálfsögðu bregðumst við því. Við verðum að tryggja það að velunnarar Stígamóta séu ekki blekktir. Og þess vegna tökum við svona hluti alvarlega.“ Guðrún segir málum ekki þannig háttað að þau séu byggð á misskilningi: „Við erum búin að fá staðfestingu á að sagt var að söfnunin væri á vegum Stígamóta. Það er alveg á hreinu að var gert.“ Guðrún segir að kæran standi enn en málið verði skoðað nánar eftir helgi.