Bíða úrlausnar mála sinna

Stríðið í Tsjetsjeníu teygir anga sína víða, meðal annars hingað til lands. Ung múslimahjón frá Tsjetsjeníu leituðu hælis hér á landi fyrir tæplega hálfum mánuði. Maðurinn segist ekki vilja berjast gegn Rússum eða nokkrum öðrum, en óttast um líf sitt, - að verða álitinn svikari af löndum sínum. Ungu hjónin heita Ruslan Bogatyrev og Sofia Juravleva. Þau koma frá höfuðborginni Grosní í Tsjetsjeníu. Sofia vildi ekki láta taka af sér myndir en staðfesti frásögn eiginmannsins. Bæði hafa misst vini og ættingja í stríðinu, Ruslan hefur misst föður sinn og bræður og hann óttast um eigið líf ef hann snýr heim. Þau hafa reynt að fá hæli annars staðar, meðal annars í Sviss, og hafa þvælst í nokkurn tíma um Evrópu á fölsuðum skilríkjum. Ruslan segir að þau hafi reynt að fá hæli í öðrum löndum áður en þau komu til Íslands. Þau reyndu að fá hæli í Sviss en fengu engin svör og þess vegna ákváðu þau að koma til Íslands þar sem þau vonast til að eitthvað verði gert í málum þeirra. Ruslan segist hvorki vilja berjast gegn Rússum né nokkrum öðrum en sem íbúí í Grosní hafi hann aðeins þrjá möguleika; að flýja úr landi, fara til fjalla og berjast gegn Rússum eða vinna með Rússum og þar með svíkja föðurland sitt, Tsjetsjeníu. Ungu múslimahjónin bera öllum hér á landi vel söguna, segja alla hafa komið vel fram, en þau kvíða þó framtíðinni. Þau segjast ekki hafa hugmynd um hvað verður um þau, hver örlög þeirra verða.