Stöð 2 braut ekki siðareglur BÍ

Fréttastofa Stöðvar 2 braut ekki gegn siðareglum Blaðamannafélags Íslands í umfjöllun sinni af slagsmálum við Hverfisgötu, að mati siðanefndar. Í apríl síðastliðnum var í fréttum Stöðvar 2 sagt frá slagsmálum fyrir utan skemmtistað. Á heima- eða bloggsíðu hóps, sem gengur undir nafninu Fazmo, var fjallað um málið en félagi eða félagar úr hópnum tóku þátt í slagsmálunum. Í frétt Stöðvar 2 var birt stutt myndskeið af síðunni og sást þar meðal annarra karlmaður sem ekki var nálægur þegar átökin áttu sér stað og kærði hann málið til siðanefndar. Þegar haft var samband við fréttastofu af hans hálfu var beðist afsökunar á því að hann hefði sést í fréttinni. Siðanefndin komst að þeirri niðurstöðu að umrætt myndskeið hefði verið mjög stutt, tvær sekúndur eða svo, og myndirnar teknar af opinberri síðu þar sem maðurinn hafi mátt búast við að myndir og frásögn af slagsmálunum yrðu tengd saman. Fréttastofa Stöðvar 2 taldist því ekki hafa brotið gegn siðareglum Blaðamannafélags Íslands.