Eina landleið Bolvíkinga

Almannavarnanefnd Bolungarvíkur kemur saman til fundar í dag vegna grjóthruns úr Óshlíð niður á þjóðveginn um helgina og vegna þess að hrun virðist vera að aukast úr hlíðinni. Sýslumaður þeirra minnir á að þetta sé eina landleið Bolvíkinga. Tvívegis varð umtalsvert hrun úr hlíðinni seinni partinn í ágúst, þótt vegfarendur slyppu þá eins og um helgina, þar sem svo vel vildi til í öllum tilvikum að enginn var á ferð þegar hrunið varð. Steinarnir sem féllu á veginn núna um helgina voru frá þrjú hunduð kílóum upp í hálft tonn og féllu úr mikilli hæð þannig að ekki hefði þurft að spyrja að leikslokum, ef þeir hefðu lent á bílum á veginum. Að sögn Einars Péturssonar bæjarstjóra hefur hann að undanförnu átt viðræður við Vegagmálastjóra og Veðurstofuna vegna þess hversu mikið hefur hrunið úr berginu á 700 til 800 metra kafla upp á síðkastið og á hann von á svörum frá Vegagerðinni við ýmsum tillögum fyrir fundinn í dag. Annars vegar þurfi að líta til framtíðarlausnar á þessum vanda og hins vegar að bregðast við bráðahættu. Jónas Guðmundsson, sýslumaður í Bolungarvík, verður á fundinum í dag. Hann segir að miðað við að þetta sé eini vegurinn sem sé á milli Bolungarvíkur og Ísafjarðar, sem mörg hundruð bílar aki um daglega, sé ekki hægt að búa við óöryggið sem fylgi þessu grjóthruni.