Greining: Lúðueldi

Fiskey ehf. mun á næstu mánuðum loka lúðueldisstöð sinni í Þorlákshöfn. Þá verður ein slík stöð eftir en Silfurstjarnan er með áframeldisstöð í Axarfirði. Lúðueldi hefur farið stigvaxandi hér á landi og nú er svo komið að jafnmikið er til af villtri lúðu og eldislúðu. Hvernig fer lúðueldi fram? Á sérstakri klakfiskastöð eru hrognin kreist úr lúðunni og því næst eru þau frjóvguð á seiðastöð en eftir fjórtán daga eru hrognin orðin að svokallaðri kviðpokalirfu. Einum og hálfum mánuði eftir hrygningu er svo farið að fæða lúðuseiðin. Í Noregi, Færeyjum, Skotlandi og Hjaltlandseyjum fer lúðueldi fram í eldiskvíum en aðstæður til þess hér á landi eru fremur óhagstæðar þar sem firðir eru óvarðir fyrir úthafi og óstöðugleiki auðveldlega sett strik í reikninginn. Því er frekar notast við eldisker hér á landi. Lúðueldi á Íslandi Rannsóknir með lúðueldi hófust hér á landi árið 1987 en þá var stofnað fyrirtækið Fiskey, sem lengst af hefur verið eina fyrirtækið sem tileinkað er þessari starfsemi. Tíu árum síðar varð svo Fiskey framleiðslufyrirtæki. Það var bæði með seiðaeldi og einnig með áframeldi þar sem lúðan var alin í slátrunarstærð en þá vegur hún um fimm kíló. Nú er svo komið að lúðustofninn í Norður-Atlantshafi er talinn vera um tvö þúsund tonn en það er svipað magn og framleitt er með eldisaðferðinni. Mesta lúðueldið fer fram í Noregi en Norðmenn vinna mest með seiði frá Íslandi. Hvar eru helstu markaðirnir? Helstu markaðir fyrir lúðu eru á Bretlandi og Bandaríkjunum en lúðuseiði eru aðallega flutt út til Noregs. Nú síðustu ár hefur markaður fyrir þau einnig verið að opnast í Kína. Einnig eru seiði seld til Færeyja og Skotlands.