Fá úthlutað lóð í Vatnsmýrinni

Borgarráð samþykkti í gær tillögu um að íslenska lyfjafyrirtækinu Invent Farma yrði úthlutað lóð í Vatnsmýrinni nálægt því svæði sem Háskólinn í Reykjavík hefur fengið úthlutað. Fyrirhugað er að Invent Farma setji þar upp rannsóknar- og þróunardeild. Dagur B. Eggertsson, formaður skipulagsráðs Reykjavíkurborgar segir mjög ánægjulegt að sú strategíska ákvörðun að bjóða Háskólanum í Reykjavík land í Vatnsmýrinni sé þegar farin að laða að sér. Reiknað er með 30 til 40 starfsmönnum í um 2000 fermetra húsnæði. Friðrik Steinn Kristjánsson, stjórnarformaður Invent Farma segir að verið sé að bæta við þróunarstarfsemi fyrirtækisins með þessari uppbyggingu í Vatnsmýrinni. Fyrir rekur Invent Farma tvær lyfjaverksmiðjur í Barcelona sem hafa eitt sameiginlegt 60 manna þróunarteymi. "Okkur þykir staðsetningin góð og það umhverfi sem við sjáum að verði þarna verður til að styrkja starfsemina." Friðrik segir að starfsmenn fyrirtækisins í Vatnsmýrinni verði íslenskir og spænskir. Spurður hvenær starfsemin hefjist segir Friðrik að í ágúst á næsta ári muni liggja fyrir deiliskipulag og það muni því verða eftir eitt og hálft til tvö ár héðan í frá.