Aukinn afli en minna verðmæti

Heildarafli íslenskra skipa nam tæplega 83.000 tonnum í ágúst. Þetta er aukning um rúm 5.700 tonn frá ágúst í fyrra þegar aflinn nam 77.200 tonnum. Aflaverðmætið dróst hins vegar saman um 6,2% frá ágúst í fyrra. Þorskaflinn dróst saman um 1.700 tonn og úthafskarfaaflinn um 5.100 tonn og skýrir það líklega stærstan hluta af samdrættinum í aflaverðmætinu. KB banki greinir frá þessu í Hálffimm fréttum. Þá nemur aflinn það sem af er ári 1.338 þús. tonnum og er það aukning frá sama tíma í fyrra um tæp 33 þúsund tonn. Þorskaflinn er rúmum tíu þúsund tonnum minni en eftir fyrstu átta mánuði síðasta árs en afli uppsjávarfisks hefur aukist um tæp 44 þúsund tonn. Aflaverðmæti það sem af er ári hefur dregist saman um 1,7% frá sama tíma í fyrra.