Leikskólakennarar áhyggjufullir

Stjórn félags leikskólakennara lýsir miklum áhyggjum af stöðu mála í leikskólanum Rjúpnahæð í Kópavogi. Útlit er fyrir að senda þurfi á fimmta tug leikskólabarna heim  á hverjum degi frá og með næstu mánaðamótum því ekkert hefur gengið að ráða starfsmenn í lausar stöður og nokkrir starfsmenn láta af störfum um mánaðamót. Ragnheiður Gróa Hafsteinsdóttir aðstoðarleikskólastjóri segir að þegar hafi þurft að senda börn heim í veikindum starfsmanna og að útlit sé fyrir að ekki verði hægt að manna eina eða tvær deildir eftir mánaðamót. Reynt verður að loka deildum til skiptis svo álagið lendi ekki allt á sömu fjölskyldunum. Vandinn er ekki bundinn við leikskólann Rjúpnahæð því fleiri leikskólar hafa þurft að draga úr þjónustu sinni og stytta opnunartíma.