Verður til í heitum sjó

Sigurður Þ. Ragnarsson veðurfréttamaður segir Katrínu fá orkuna sem hún losi úr sjónum Hann segir að til þess að fellibylur myndist þurfi hitastig sjávar að verða meira en 28 gráður. Þegar Katrín hafi myndast hafi sjórinn verið 32-33 gráður þannig að allar forsendur til myndunar á mjög öflugum fellibyl hafi verið fyrir hendi. Sigurður segir sjóinn óvenjulega heitan því að verðufar á jörðinni fari hlýnandi og þá hafi fellibyljatímabilið lengst, en ekki sjái fyrir endann á því. Sá uppgufunarvarmi sem verði í fellibylnum sé orkan sem verði til, loft stígi upp og þéttist og myndi mikla úrkomu sem sjáist á fréttamyndum og þá losni orka sem valdi hamförunum. Sigurður segir að þegar fellibylur sé að stærð fimm þá sé vindhraðinn meiri en 250 kílómetrar á klukkustund. Það sé um 70 metrar á sekúndu og ef einhver sé staddur nærri hamförunum og finni eitthvað til að grípa í þá standi líkami viðkomandi eins og flagg í flaggstöng. Vindhraðinn sé svo mikill að fólk ráði engan veginn við þær aðstæður sem skapist og ef rýmingaráætlanir hafi ekki gengið sé fólk í New Orleans og nágrenni í mikilli lífshættu. Þá bæti það ekki úr skák að New Orleans sé undir sjávarborði og þegar loftþrýstingur falli, eins og þarna hafi gerst, hækki sjávarborð og fjandinn verði laus. Aðspurður hvort von sé á frekari hamförum af þessu tagi vegna gróðurhúsaáhrifa segir Sigurður það alveg ljóst að svo verði og þær sjáist víðar. Þetta sé hins vegar mikið skólabókardæmi. Sjórinn sé svo hlýr vegna þess að liðið sé á sumarið og hann geti aðeins orðið svona hlýr við suðurströnd Bandaríkjanna og sums staðar á Kyrrahafi. Þessi svæði séu hættulegust. Fellibyljir geti hins vegar ekki myndast við Íslandsstrendur því sjórinn sé ekki nógu hlýr en fellibyljir geti borist hingað sem úrsérgengnar lægðir og venjulegt hvassviðri. Sigurður segir miklar lægðir eins og þessa ganga mjög hratt niður þegar þær komi á land vegna þess að þær gangi fyrir hlýjum sjó. Á næstu tólf tímunum eigi vindhraðinn í Katrínu eftir að detta niður í 38 metra á sekúndu sem sé eins og íslenskt fárviðri.