Fjölþjóðleg sprengjueyðingaræfing

Fjölþjóðleg æfing sprengjueyðingarsveita, Northern Challenge 2005, hefst í dag. Landhelgisgæslan og varnarliðið standa fyrir æfingunni en markmið hennar er að æfa viðbrögð við ýmiss konar hryðjuverkum, svo sem sjálfsmorðssprengjuárásum og sprengingum á flugvöllum, í höfnum og um borð í skipum. Æfingin stendur yfir fram á föstudag á þessum fimm dögum munu sprengjusérfræðingarnir glíma við 130 verkefni. Þátttakendur eru um eitt hundrað talsins, en helmingur þeirra kemur frá sex erlendum sprengjueyðingarsveitum. Sigurður Ásgrímsson, sprengjusérfræðingur hjá Landhelgisgæslu Íslands, segir að æfð verði viðbrögð við hryðjuverkaárásum og sprengjutilræðum sem séu mjög algeng í dag. Verið sé að sprengja einhvern í loft upp á hverjum degi einhvers staðar í heiminum og aðalviðbúnaðurinn snúist um að verjast því, gera heimatilbúnar sprengjur óvirkar. Spurður hvernig menn æfi viðbrögð við sjálfsmorðssprengjuárásum segir Sigurður varla hægt að lýsa því. Ákveðnir ferlar séu notaðir og lögð verði áhersla á þá á æfingunni. Hingað séu komnir sérfræðingar frá Bretlandi í þessum efnum og þeir hafi verið með fyrirlestur í gær um það hvernig menn hafi brugðist við þessu þar í landi og hver reynslan hafi verið annars staðar frá. Erfitt sé að segja frá þessu þar sem hvert verkefni hafi sitt viðfang. Hingað til hefur almenningur líklega helst orðið var við sprengjueyðingarsveit Landhelgisgæslunnar þegar eyða þarf tundurdufli sem slæðist á land. Aðspurður hvort þeirra starf sé ekki komið á aðeins annað stig með hryðjuverkaógninni og öllu þeim viðbúnaði sem henni tilheyrir segir Sigurður að í raun og veru sé svo ekki. Sprengjueyðingarsveitin hafi alltaf verið með þennan viðbúnað, en eftir árásirnar á Bandaríkin árið 2001 hafi verið lögð meiri áhersla á þennan hluta í starfi sprengjusveitarinnar.