100-200 ár milli stórra bylja

Fellibyljir á borð við Katrínu ganga yfir þennan hluta Bandaríkjanna á 100 til 200 ára fresti. Loftþrýstingurinn í miðju bylsins er rétt um 915 millíbör, sem gerir það að verkum að sjór lyftist um fleiri metra þar sem hann gengur yfir, að sögn veðurfræðings á Veðurstofu Íslands. Veðurfræðingar hafa fylgst með tilurð og ferðalagi Katrínar undanfarna daga og kom snemma í ljós að hún yrði einn af þeim stóru. New Orleans liggur við ósa Mississippifljóts, mjög lágt og þess vegna geta afleiðingarnar orðið svona hrikalegar ef Katrín gengur beint yfir borgina. En hversu stór er hún eiginlega? Einar Sveinbjörnsson, veðurfræðingur á Veðurstofu Íslands, segir erfitt fyrir Íslendinga að átta sig á þessu þar sem þeir búi ekki á fellibyljasvæði. Fellibyljir séu tiltölulega litlir um sig og svæðið þar sem þeir blási af fullum styrk sé ekki gríðarlega stórt. Þeim fylgi gjarnan mikil úrkoma. Það sé þó ekki vandamálið í suðurríkjum Bandaríkjanna heldur fremur lágur loftþrýstingur í miðju bylsins. Talað sé um að hann sé 915 millíbör í miðjunni, en hann hafi aldrei mælst svo lágur hér á landi, og það hafi í för með sér að yfirborð sjávar lyftist um 6-8 metra. Á því svæði sem Katrín komi inn, við óshólma Mississippi-árinnar sem hafi hlaðist upp á síðustu árþúsundum og lengst talsvert eftir að New Orleans var byggð, sé afskaplega láglent og yfirgnæfandi líkur á því að sjór gangi á land á mjög stóru landsvæði. En fyrst fellibyljirnir eru ekki það miklir um sig, er það þá bara óheppni eða tilviljun að hann lendir á New Orleans? Einar segir það auðvitað tilviljun en að á þessum stað megi menn alltaf gera ráð fyrir að það komi fellibylur af þessum styrk á 100-200 ára fresti, jafnvel oftar. Þó svo að þetta hafi ekki gerst síðustu 100-200 árin hafi menn alltaf mátt eiga von á því að einhverju sinni myndi slá til. Spurður hvort þetta sé eins og þegar Íslendingar bíði eftir Suðurlandsskjálfta tekur Einar að nokkru leyti undir það en bendir jafnframt á snjóflóð úr fjalli. Vitað sé af hættunni þar en það falli ekki stórt snjóflóð nema á nokkur hundruð ára fresti.