Athugasemdir teknar til greina

Forstöðumaður Rannsóknarnefndar flugslysa segir athugasemdir sérstakrar rannsóknarnefndar um flugslysið í Skerjafirði réttmætar og að þær hafi flestar þegar verið teknar til greina. Samgönguráðherra vill ekki segja orð um málið fyrr en á vinnudegi. Í skýrslu hinnar sérstöku rannsóknarnefndar eru gerðar fjórar tillögur um úrbætur á starfsháttum Rannsóknarnefndar flugslysa, sem lúta einkum að varðveislu flugvélaflaka og einstakra hluta þeirra auk þess sem mælst er til þess að hinn mannlegi þáttur í orsökum flugslysa verði kannaður sem nákvæmast. Rannsóknarnefndin er sátt við þessar athugasemdir að sögn Þormóðs Þormóðssonar, formanns hennar. Hann segir tillögurnar vel rökstuddar, uppbyggilegar og gagnlegar og miða að því að gera störf Rannsóknarnefndar flugslysa enn betri.  Spjót nefndarinnar beinast nokkuð að Flugmálastjórn í skýrslunni. Átta tillögur um úrbætur eru gerðar sem snúast meðal annars um hert eftirlit með smærri flugrekendum, endurskoðun verklagsreglna um útgáfu lofthæfisskírteina, að hert verði á verklegri þjálfun flugmanna sem starfa hjá litlu flugfélögunum, hert eftirlit með því að farþegaskrár séu haldnar og fleira. Flugmálastjórn gerði athugasemdir við frumdrög skýrslunnar en ekki var tekið tillit til þeirra. Þormóður segir það ekki sitt að svara fyrir Flugmálastjórn, en hann geti bent á að í skýrslu Rannsóknarnefndar flugslysa hafi komið fram að nefndin taldi að kalla hefði átt eftir gögnum áður en gefið var út lofthæfisskírteini fyrir vélina. Það komi jafnframt fram í nýju skýrslunni. Rétt er að taka fram að hin sérstaka rannsóknarnefnd tók ekki undir þá athugasemd aðstandenda að flugumferðarþjónustu hefði verið ábótavant eins og sagt var í gær, heldur lagði hún aðeins til að hugað yrði að breyttu orðalagi flugumferðarstjóra ef hreyfill stöðvast í nánd við flugvöll til að fyrirbyggja misskilning. Fréttastofa hitti Sturlu Böðvarsson samgönguráðherra í dag en hann sagðist ekki myndu tjá sig nokkuð um málið fyrr en á vinnudegi.