Hærri tekjur á suðvesturhorninu

Embætti skattstjóra um land allt lögðu fram skrá yfir álagða skatta árið 2005 í gær. Upplýsingar um álagninguna liggja frammi hjá embættunum til 12. ágúst næstkomandi og er öllum frjálst að kynna sér þær. Álögð gjöld í Reykjavík og Reykjanesumdæmi eru samtals um 114 milljarðar króna af um 145 milljörðum króna sem er áætluð tekjuskattsbyrði allra landsmanna. Þannig koma nærri 80 prósent álagðra gjalda meðal einstaklinga af Suðvesturhorni landsins en þar búa liðlega tveir þriðju hlutar landsmanna. Ef aðeins er tekið mið af tíu hæstu greiðendum í öllum níu umdæmunum eru gjöld að jafnaði langhæst í Reykjavík eða liðlega 67 milljónir króna að jafnaði. Næst hæst eru gjöldin í Reykjanesumdæmi eða um 40 milljónir króna að meðaltali í hópi tíu hæstu greiðenda. Í þriðja sæti eru greiðendur í embætti Skattstjóra Suðurlands eða nærri 23 milljónir króna að meðaltali. Álögð gjöld eru að jafnaði lægst á Norðurlandi vestra, á Vestfjörðum og Austurlandi eða sex til sjö milljónir króna í hópi þeirra tíu hæstu í hverju umdæmanna. Gjöldin skiptast þannig að tekjuskattur er innan við helmingur heildar álagningarinnar,en útsvar, fjármagnstekjuskattur og önnur gjöld liðlega helmingur. Þannig nemur tekjuskattur Reykvíkinga um 30 milljörðum króna, útsvar 28 milljörðum og þeir greiða samtals um þrjá og hálfan milljarð króna í fjármagnstekjuskatt. Samtals nema gjöld skattgreiðenda í höfuðborginni alls um 65 milljörðum króna. Hæsti skattgreiðandi landsins er Frosti Bergsson kaupsýslumaður en hann greiðir alls um 123 milljónir króna í skatta. Kaupsýslu- og eignafólk er áberandi í hópi hæstu skattgreiðenda. Norðurlandsumdæmi vestra sker sig úr en þar eru sjö læknar meðal tíu hæstu skattgreiðendanna. Aðeins átta konur eru í hópi eitt hundrað gjaldahæstu einstaklinganna í landinu. Þær eru aftur á móti um helmingur þeirra sem greiða hæsta eignaskattinn