Samningur undirritaður við Breta

Forstjóri Landhelgisgæslunnar, Georg Lárusson, skrifaði nýlega undir endurnýjun á tvíhliða samningi við Bresku sjómælingarnar (UKHO). Þar var m.a. bætt við samþykkt um að Ísland gangi til liðs við IC-ENC (International Centre for ENCs) og að IC-ENC sjái um dreifingu á rafrænum sjókortum fyrir Sjómælingar Íslands sem eru deild innan Landhelgisgæslunnar. Einnig felst í samningnum að UKHO kemur fram fyrir hönd LHG/SÍ hvað varðar höfundréttarmál gagnvart þeim fyrirtækjum sem nota gögn frá Landhelgisgæslunni/Sjómælingum Íslands. LHG/SÍ hófu fyrir skömmu framleiðslu á rafrænum sjókortum (ENC, Electronic Navigational Chart). Þetta eru kort sem geta komið í stað hefðbundinna prentaðra sjókorta að uppfylltum ákveðnum skilyrðum, m.a. þeim að þau notist í ECDIS (Electronic Chart Display and Information System ) sjókorta- og upplýsingakerfi.