Milljónir fylgdust með

Í gær tóku þjóðir um allan heim höndum saman og héldu tónleika í níu borgum til að vekja athygli á neyð þróunarlandanna og safna pening þeim til styrktar. Tónleikarnir hófust í Tokýó, en einnig voru haldnir tónleikar í London, París, Róm, Moskvu, Fíladelfíu, Berlín, Barrie í Kanada og í Jóhannesarborg. Björk kom fram á tónleikum í Tokýó þar sem tíu þúsund manns voru saman komnir. Höllin sem tónleikarnir fóru fram í rúmar þó tvöfalt meiri fjölda en það. Björk talaði til fjöldans og sagði meðal annars: "Það að átta sig á því að vandamálið er til staðar er mjög mikilvægt skref". Tónleikagestir í London fengu mikið fyrir sinn snúð en U2 og Paul McCartney voru fyrstir á svið og sungu þeir saman sérstaka útgáfu af laginu Sgt. Pepper's Lonely Heart Club Band en rúmlega tvö hundruð þúsund manns mættu á tónleikana. "Ég trúi að viðburður eins og þessi geti virkilega skipt sköpum. Þessi kynslóð með sinni rödd, sínum atkvæðum, sínum dugnaði, getur virkilega útrýmt fátækt," sagði Kofi Annan, framkvæmdastjóri Sameinuðu þjóðanna á tónleikunum í London. Skipuleggjendur áætla að um tvær milljónir manna hafi sótt tónleikana um allan heim og að um það bil 85 prósent mannkyns hafi aðgang að þeim í sjónvarpi, útvarpi eða interneti. Bob Geldof lét þau orð falla þegar þrír tímar voru liðnir af tónleikunum að þrír milljarðar manna um allan heim væru að fylgjast með.