Pulis var rekinn frá Stoke

Tony Pulis, knattspyrnustjóri Íslendingaliðsins Stoke City, var í hádeginu í dag óvænt rekinn frá félaginu eftir 30 mánaða starf. Tregða við að skoða erlenda leikmannamarkaði er ástæðan fyrir brottrekstrinum segir stjórnarformaður Stoke City, Gunnar Þór Gíslason. Tilkynnt verður um nýjan knattspyrnustjóra á blaðamannfundi á morgun og staðfesti Gunnar Þór að um útlending væri að ræða. Hann er þó ekki íslenskur sagði stjórnarformaðurinn. Pulis var á 12 mánaða samning en hann fékk nýjan samning fyrir þremur mánuðum og töluverða kauphækkun. „Við lögðum mikla áherslu á að Pulis skoðaði erlenda leikmannamarkaði eins og var gert undir stjórn Guðjóns Þórðarsonar en við sáum það eftir tímabilið að Pulis var algerlega ófáanlegur til þess og þess vegna var ekkert annað hægt að gera en að segja honum upp,“ sagði Gunnar Þór í samtali við íþróttadeild Stöðvar 2 og Sýnar í dag. Stoke þarf að greiða Pulis laun í 12 mánuði og verður því með tvo stjóra á launum á næsta tímabili. Pulis tók við liðinu í nóvember árið 2002 af Steve Cotteril. Stoke hafnaði í 12.sæti í fyrstu deildinni á síðustu leiktíð. Landsliðsmaðurinn Þórður Guðjónsson er á mála hjá liðinu en hann fékk fá tækifæri undir stjórn Pulis og hagur hans gæti vænkast með nýjum erlendum knattspyrnustjóra. „Það er eftirsjá af Pulis og hann var besti Englendingurinn í starfið en við gátum ekki þolað það að hann setti sig upp á móti stefnu stjórnarinnar um að fá erlenda leikmenn,“ sagði Gunnar Þór við íþróttadeildina. Stjórnarformaðurinn sagði ennfremur að félagið yrði ekki selt á næstu leiktíð en það væri þó enn til sölu. Gunnar Þór var á leiðinni til Englands að ganga frá samningi við nýjan knattspyrnustjóra hjá Íslendingaliðinu og vildi alls ekki segja hver hann væri.