Tugir skotnir í Eþíópíu í gær

Að minnsta kosti tuttugu og tveir létust í skothríð öryggissveita eþíópísku ríkisstjórnarinnar í höfuðborginni Addis Ababa í gær. Öryggissveitirnar hófu skothríðina þegar mótmælendur hófu að fleygja grjóti í átt að þeim. Miklar óeirðir hafa nú verið í höfuðborginni síðustu þrjá daga en mótmælendur saka ríkisstjórnarflokkinn og forsetann um að hafa svindlað í kosningum fyrir þremur vikum til að tryggja sér áframhaldandi völd. Ríkisstjórnin segir að öryggissveitirnar hafi einungis verið að reyna að stilla til friðar og staðfestir ekki fregnir um mannfall. Meles Zenawi forseti landsins bannaði öll mótmæli strax eftir kosningarnar 15. maí en það hefur ekki stöðvað mótmælendur sem vilja meina að hann hafi brotið á kosningarétti fjölmargra. Eftirlitsmenn frá Evrópusambandinu sem fylgdust með kosningunum á sínum tíma sögðu þær hafa verið þær langlýðræðislegustu sem landið hefur upplifað. Engu að síður báru eftirlitsmennirnir vitni um allmörg brot á mannréttindum kjósenda.