Hveitipokaveggur í París

Franskir bændur fjölmenntu í miðborg Parísar í dag og byggðu vegg úr hveitipokum til að þrýsta á nýju ríkisstjórnina um breytingar á landbúnaðarstefnu Evrópusambandsins. Þeir segja stefnu sambandsins leiða til alltof lágs verðs á kornmarkaðnum og notuðu því fimm tonn af hveitipokum til að leggja áherslu á mál sitt. Franskir kornbændur hafa átt erfitt uppdráttar á heimsmarkaði en uppskera víða um heim var góð svo framboð er mikið og verð þar af leiðandi heldur lágt. Bændurnir krefjast þess að Evrópusambandið verndi Evrópumarkaðinn og kvarta að auki undan of lágum útflutningsstyrkjum.