Ákært fyrir fjöldamorðin í Dujail

Fjöldamorð á íbúum smábæjarins Dujail í Írak verður fyrsti ákæruliðurinn sem tekinn verður fyrir í réttarhöldunum yfir Saddam Hussein, fyrrverandi Íraksforseta. Fastlega er búist við að réttarhöldin hefjist innan tveggja mánaða. Dujail er fámennt bændasamfélag. Það var þar sem gerð var árás á bílalest Saddams Husseins árið 1982. Banatilræðið við forsetann mistókst en hefndaraðgerðir manna hans voru miklar. 50 bæjarbúar voru teknir af lífi. Auk Saddams Husseins verða fimm menn, þeirra á meðal hálfbróðir hans, ákærðir fyrir fjöldamorðin í Dujail.  Mohammed Hassan Mahmoud, bæjarstjóri í Dujail, segir að íbúar séu mjög ánægðir með að mál bæjarins skuli vera fyrsta ákæra sem lögð verði fram á hendur Saddam Hussein. Bærinn sé stoltur af því að vera sá fyrsti sem refsi harðstjóranum. Ákæran á hendur Saddam, sem var handsamaður í desember árið 2003, er viðamikil og tekur til glæpa gegn mannkyni í 23 ára valdatíð hans. Morð á trúarleiðtogum og pólitískum andstæðingum er meðal ákæruliða sem og eiturgasárás á Kúrda og fjöldamorð þegar hann barði niður uppreisn sjíta og innrásin í Kúveit. Búið er að koma upp réttarsal á Græna svæðinu svokallaða í Írak þar sem írakska ríkisstjórnin hefur aðsetur og bandaríska sendiráðið er til húsa. Lögmenn Saddams Husseins gagnrýna íröksk stjórnvöld fyrir að ætla sér of lítinn tíma fyrir undirbúning réttarhaldanna og kvarta jafnframt yfir því að hafa ekki aðgang að Saddam og ellefu öðrum mönnum, sem voru valdamiklir í Írak, en þeim er haldið föngnum í bandarísku fangelsi í grennd við flugvöllinn í Bagdad.