Vaxandi skotvopnaeign í Osló

Lögreglan í Osló hefur miklar áhyggjur af vaxandi beitingu skotvopna í höfuðborginni. Skotvopnum hefur tíu sinnum verið beitt í Osló á síðustu tveimur árum. Tuttugu og sjö ára gamall maður liggur lífshættulega særður á sjúkrahúsi í borginni eftir skotbardaga í morgun. Tveir menn hafa verið handteknir og hins þriðja er leitað. Ekki er ljóst um ástæðuna fyrir þessum átökum. Lögreglan í Osló hefur áhyggjur af því hversu oft skotvopnum er beitt þegar til átaka kemur, af einhverjum orsökum. Finn Abrahamsen lögregluforingi segir að með þessu áframhaldi sé aðeins tímaspursmál hvenær einhver alsaklaus borgari verði fyrir skotum og láti lífið. Á síðustu tveim árum hefur tíu sinnum komið til skotbardaga í Osló og yfirleitt eru þar glæpagengi í einhverskonar uppgjöri. Bardagarnir eru hins vegar háðir úti á götum borgarinnar og vegfarendum er því augljós hætta búin. Reglur um byssueign eru nokkuð strangar í Noregi en glæpamenn virðast eiga auðvelt með að verða sér úti um hvers konar skotvopn.