S.þ. fordæma meintar pyntingar

Sameinuðu þjóðirnar fordæmdu í morgun meintar pyntingar bandarískra hermanna á afgönskum stríðsföngum í herstöð skammt frá Kabúl árið 2002. Samtökin krefjast þess að málið verði rannsakað. Sameinuðu þjóðirnar hafa brugðist harkalega við fréttum af pyntingum á tveimur afgönskum stríðsföngum í Bagram-herstöðinni skammt frá Kabúl í desember árið 2002, um það bil ári eftir innrás bandamanna þegar talíbanastjórninni í Afganistan var steypt af stóli. Talið er að fangarnir hafi látist af völdum pyntinganna en bandaríska stórblaðið The New York Times komst yfir leynilega skýrslu bandaríkjahers um málið og greindi frá því á föstudag að bandarískir hermenn væru sakaðir um misþyrmingarnar. Á blaðamannafundi sem boðaður var í Kabúl í morgun fordæmdu fulltrúar Sameinuðu þjóðanna hinar meintu pyntingar og sögðu þær algerlega óásættanlegar og ógna öllu því sem alþjóðasamfélagið stæði fyrir í Afganistan. Richard Provencher, talsmaður S.þ. í landinu, krafðist þess að málið yrði rannsakað og að þeir sem bæru ábyrgð á pyntingunum yrðu sóttir til saka. Hamid Karzai, forseti Afganistans, er í fjögurra daga opinberri heimsókn í Bandaríkjunum. Hann ætlar að ræða málið við George Bush forseta á fundi þeirra á morgun og krefjast þess að gripið verði til harðra aðgerða gegn þeim sem bera ábyrgð á pyntingunum. Hann krefst þess einnig að Bandaríkjastjórn afhenti alla afganska fanga sem enn eru í haldi Bandaríkjamanna. Hingað til hafa fréttir borist af pyntingum á stríðsföngum í Írak og er skemmst að minnast misþyrminganna í Abu Graib fangelsinu. Spurningar hafa nú vaknað um meðferð bandarískra hermanna á stríðsföngum í öðrum löndum.