KR stal sigrinum

Ekki er hægt að segja annað en að Þróttarar hafi verið miklir klaufar að tapa leiknum því þeir komust í 2-1 þegar 20 mínútur voru eftir af leiknum. En KR-ingar, sem tefldu fram hálfgerðu varaliði í gær, náði með mikilli eljusemi að vinna sig inn í leikinn á ný og sem eins og fyrr segir var það þrumufleygur Sigmundar sem skildi liðin af að lokum. "Ég get ekki verið annað en ánægður með að hafa unnið hér í dag með alla þessa ungu leikmenn í liðinu," sagði Magnús Gylfason, þjálfari KR í samtali við Fréttablaðið eftir leikinn. Liðið var án 6 fastamanna í leiknum og ekki bætti úr skák að Grétar Hjartarson þurfti að yfirgefa völlinn strax í upphafi, en meiðsli hann reyndust ekki alvarleg. Þá fékk Bjarnólfur Lárusson að líta rauða spjaldið á lokamínútu fyrri hálfleiks ásamt Jensi Sævarssyni hjá Þrótti og því stóð liðið sem KR tefldi fram í síðari hálfeik að miklu leyti af leikmönnum 2. flokks félagsins. Það voru Þróttarar sem voru mun betri aðilinn í leiknum á heildina litið en leikmenn liðsins voru klaufar að nýta sér ekki þau marktækifæri sem þeir fengu í leiknum. "Svona fer ef maður heldur ekki fullri einbeitingu í 90 mínútur," sagði Eysteinn Lárusson, varnarmaður Þróttar í leikslok. "Þetta er hundsvekkjandi því við erum miklu betri stærstan hluta leiksins. En við gleymum okkur tvisvar undir lokin og er refsað," sagði Eysteinn sem fannst úrslitin ósanngjörn. "En þetta sýnir okkur jafnframt að við getum vel staðið í þessum stóru liðum. Við ætlum að standa okkur í sumar og við tökum þá bara í deildinni í sumar," bætti Eysteinn við í léttum tón. Eysteinn átti fínan dag í vörn Þróttar og var besti maður liðsins ásamt Daníeli Hafliðasyni, sem átti skínandi leik á miðjunni, og framherjanum Guðfinni Ómarssyni. Hjá KR var Færeyingurinn Rógvi Jacobsen öflugur í miðverðinum í fjarveru Tryggva Bjarnasonar og þá var Sölvi Davíðsson atkvæðamikill á hægri kantinum. Þá er enn ónefndur vinstri bakvörður KR-inga í gær, Gunnar Kristjánsson. Þar er á ferð 18 ára strákur sem er sóknarmaður að upplagi og er klárlega einn fljótasti leikmaður landsins. Hann átti margar fínar rispur í leiknum í gær og ef eitthvað er að marka frammistöðu hans í gær er þarna á ferð leikmaður sem á eftir að láta mikið að sér kveða í sumar.