Lok, lok og læs hjá Njarðvík

Njarðvíkingar tóku Fjölnismenn í kennslustund í varnarleik í Laugardalshöllinni í gær þegar liðin mættust í bikarúrslitaleiknum í karlaflokki í körfu. Njarðvíkingar fóru með sigur af hólmi, 90-64, eftir að hafa haft yfir, 43-39, í hálfleik. Njarðvíkingar tóku besta sóknarlið Intersportdeildarinnar og slökktu á því en Fjölnir hafði minnst skorað 74 stig á tímabilinu fyrir leikinn í gær. Njarðvíkingar byrjuðu leikinn með látum og skoruðu fyrstu ellefu stig leiksins. Fjölnismenn vöknuðu hins vegar til lífsins eftir það og lengi framan af hálfleiknum var jafnræði með liðunum. Njarðvíkingar voru með fjögurra stiga forystu í hálfleik en í síðari hálfleik tók liðið öll völd á vellinum. Þeir lokuðu vörninni, hittu frábærlega í sókninni og gerðu út um leikinn í þriðja leikhluta. Síðasti leikhlutinn var eingöngu formsatriði og juku Njarðvíkingar forystuna allt til leiksloka. Guðmundur Jónsson átti frábæran leik í liði Njarðvíkinga og skoraði 20 stig. Hann sagði aðspurður að þetta hefði ekki verið besti leikur hans á ferlinum en góður samt. "Skotin duttu í dag og það var frábært. Við vissum að við þurftum að hafa fyrir því að vinna þetta Fjölnislið og það var frábært að liðið spilaði eins vel í dag og raun ber vitni," sagði Guðmundur og bætti við að nú væri einn titill eftir. Magnús Pálsson, fyrirliði Fjölnis, var daufur í dálkinn eftir leikinn en þessi nítján ári gamli strákur var, líkt og flestir félaga hans, að spila sinn fyrsta úrslitaleik. "Við stóðum í Njarðvíkingum í deildinni og það var leiðinlegt að geta ekki endurtekið það. Við áttum aldrei möguleika í leiknum en þetta er frábær reynsla og við lærðum heilmikið af þessu," sagði Magnús sem náði að líta á björtu hliðarnar.